रौतहट । रौतहटको परोहा नगरपालिकामा नगर प्रहरीको एक महिने आधारभूत तालिम सफलतापूर्वक सम्पन्न भएको छ। तालिमको समापन अवसरमा आयोजित एक विशेष कार्यक्रमका बीच नवप्रशिक्षित नगर प्रहरीहरूलाई सम्मान तथा दीक्षित गरिएको छ।
कार्यक्रमका प्रमुख अतिथि एवं परोहा नगरपालिकाका नगर प्रमुख शेख वकिल (Shekh Wakil) ले नवनियुक्त नगर प्रहरीहरूलाई सम्मानपत्र प्रदान गर्नुभयो। सो अवसरमा बोल्दै नगर प्रमुख वकिलले नगरको शान्ति–सुरक्षा, सार्वजनिक सम्पत्तिको संरक्षण र सेवा प्रवाहमा नगर प्रहरीको भूमिका मेरुदण्डको रूपमा रहने बताउनुभयो।
”नगर प्रहरीले आफ्नो जिम्मेवारीबोध गर्दै पूर्ण अनुशासन र नयाँ जोशका साथ नागरिकको सेवामा समर्पित हुनुपर्छ,” नगर प्रमुख वकिलले भन्नुभयो, “तपाईंहरूको व्यवहारले नै नगरपालिकाको छवि झल्काउने भएकाले नागरिकमैत्री प्रशासन बनाउन इमानदार भएर लाग्न आग्रह गर्दछु।”
सम्मान कार्यक्रममा नगर उपप्रमुख सुगान्धी गिरीले नगर प्रहरीको आगमनले पालिकाको कार्यसम्पादनमा थप सहजता आउने विश्वास व्यक्त गर्नुभयो। कार्यक्रममा नेपाली कांग्रेस रौतहटका जिल्ला सचिव रामचन्द्र गिरी, नगरपालिकाका इन्जिनियर दीपेन्द्र यादव, वडा नम्बर १ देखि ९ सम्मका वडा अध्यक्षहरू, सुरक्षा निकायका प्रतिनिधि, प्रशिक्षक तथा स्थानीय सरोकारवालाहरूको उल्लेख्य सहभागिता रहेको थियो।
एक महिनासम्म चलेको कडा शारीरिक तथा सैद्धान्तिक तालिमपश्चात् नगर प्रहरीहरू अब कार्यक्षेत्रमा खटिनका लागि तयार भएका छन्। कार्यक्रममा सहभागी अतिथिहरूले नवप्रवेशी नगर प्रहरीहरूसँग प्रत्यक्ष संवाद गर्दै उनीहरूलाई सफल कार्यकालको शुभकामना दिएका थिए। तालिमले नगर प्रहरीमा आवश्यक सीप, अनुशासन र व्यावसायिकता विकास गरेको आयोजकको विश्वास छ।
