राजपुर, रौतहट।
राजपुर नगरपालिकाले नवनिर्मित प्रशासकीय भवनको भव्य उद्घाटन आज एक विशेष समारोहका साथ सम्पन्न गरेको छ। नगर प्रमुख डा. मो. राजिक आलम ज्यू द्वारा रिबन काटेर र शिलालेख अनावरण गरी भवनको औपचारिक रूपमा उद्घाटन गरिएको हो।
सो उद्घाटन समारोहका प्रमुख अतिथि आफै नगर प्रमुख डा. मो. राजिक रहेको र बिशिस्ट अतिथिको रूपमा जिल्ला प्रशासन कार्यालय रौतहटका जिल्ला प्रमुख दिनेश सागर भुसाल ज्यू लगायत कार्यक्रमका अध्यक्षता उपनगर प्रमुख जमिला असगरीले गर्नुभएको थियो।
कार्यक्रममा जनप्रतिनिधिहरू, नगरपालिकाका कर्मचारीहरू, स्थानीय अगुवाहरू तथा नगरिकहरूको बाक्लो सहभागिता रहेको थियो। उपस्थित सबैले नगरपालिकाको इतिहासमा यो भवन निर्माण एक महत्त्वपूर्ण उपलब्धि भएकोमा खुसी व्यक्त गरेका थिए।
उद्घाटनपश्चात् बोल्दै नगर प्रमुख डा. मो. राजिक आलम ज्यूले नयाँ भवन सञ्चालनमा आएसँगै नगरपालिकाको सेवा प्रवाह थप सहज, प्रभावकारी र नागरिकमैत्री हुने विश्वास व्यक्त गर्नुभयो। “अब नगरवासीहरूले आधुनिक र व्यवस्थित वातावरणमा एकै स्थानबाट सबै प्रशासनिक सेवाहरू प्राप्त गर्न सक्नुहुनेछ,” उहाँले भन्नुभयो।
५ करोड ७२ लाख रुपैयाँको लागतमा नयाँ प्रशासकीय भवन निर्माण सम्पन्न भएको जानकारी नगरपालिकाका लेखा अधिकृत मनोज कर्णले दिए।
प्रमुख अतिथि जिल्ला प्रमुख दिनेश सागर भुसालले पनि भवनको निर्माणले नगरको प्रशासनिक क्षमता बढाउनुका साथै सुशासन कायम गर्न मद्दत पुग्नेमा जोड दिनुभयो।
